कोरोना संकटात पोलिसांचे योगदान मोलाचे, आदित्य ठाकरे यांचे प्रतिपादन
कोरोनाकाळात आपण घरात असताना पोलीस बांधव आपल्या सुरक्षेसाठी रस्त्यावर कार्यरत आहेत. कोरोना संकटाच्या कालावधीत पोलिसांचे योगदान मोलाचे असून त्यांच्या परिवाराकरिता काही करणे हे आपले कर्तव्यच असून त्यांच्यासाठी लसीकरण शिबीर म्हणजे त्यांचे आभार मानण्याची संधी आहे, असे प्रतिपादन पर्यावरणमंत्री तथा मुंबई उपनगर जिल्ह्याचे पालकमंत्री आदित्य ठाकरे यांनी केले.
मुंबई पोलिसांच्या कुटुंबीयांसाठी चेंबूर येथे आयोजित लसीकरण शिबिराचे उद्घाटन आदित्य ठाकरे यांच्या हस्ते झाले. यावेळी महापौर किशोरी पेडणेकर, खासदार राहुल शेवाळे, पोलीस आयुक्त हेमंत नगराळे आदी उपस्थित होते. श्रीमती तारादेवी फाउंडेशन, एस. एस. हॉस्पिटल आणि ग्रीन एकर्स अपॅडमी यांच्या सौजन्याने हे शिबीर आयोजित करण्यात आले आहे.