कलिना विद्या संकुलातील इमारतींना त्वरित एनओसी द्या!
मुंबई विद्यापीठाच्या कलिना संकुलातील विविध विभागांच्या इमारती बांधून तयार आहेत. या इमारती वापरात आणण्यासाठी ना-हरकत व भोगवटा प्रमाणपत्र त्वरित देण्याचे आदेश राज्यपाल भगतसिंह कोश्यारी यांनी आज दिले.
राज्यपाल भगतसिंह कोश्यारी यांनी मुंबई विद्यापीठाच्या कलिना परिसराला भेट दिली व विविध विभाग व इमारतींची पाहणी केली. कलिना विद्यापीठाच्या 38 इमारती महानगरपालिका व अग्निशमन विभागाच्या ना-हरकत व भोगवटा प्रमाणपत्राशिवाय पडून आहेत. त्यांची पाहणी केल्यानंतर राज्यपालांनी त्यानंतर विद्यापीठातील अधिकारी व पालिका अधिकाऱयांशी बोलताना त्वरित एनओसी देण्याची वरील सूचना केली.
कलिना परिसर येथे मुंबई विद्यापीठातर्फे बांधण्यात येणारे नवीन परीक्षा भवन, ग्रंथालय भवन, आंतरराष्ट्रीय विद्यार्थी वसतिगृह व नवे मुलींचे वसतिगृह व भावी योजना याबाबत सादरीकरण झाले.
राज्यपालांनी यावेळी डॉ. आंबेडकर भवन, नॅनो सायन्स व नॅनो टेक्नॉलॉजी केंद्र, इन्क्युबेशन फॉर डेव्हलपिंग आंत्रप्रेन्युअरशिप अँड स्टार्टअप केंद्र, हरित तंत्रज्ञान भवन, स्कूल ऑफ बेसिक सायन्सेस, नवे परीक्षा भवन व जवाहरलाल नेहरू ग्रंथालय येथे भेट दिली तसेच प्रयोगशाळा व ग्रंथालयाची पाहणी केली.
कुलगुरू सुहास पेडणेकर यांनी राज्यपालांचे विद्यापीठाच्या राजाबाई टॉवरची प्रतिकृती भेट देऊन स्वागत केले. बैठकीला प्र-कुलगुरू रवींद्र कुलकर्णी, प्रभारी कुलसचिव बळीराम गायकवाड तसेच विविध विभागांचे विभागप्रमुख व अधिसभेचे सदस्य उपस्थित होते.